Vitamina G, activa a túa lingua!
Emma e Lauren son dúas nenas da Sagrada Familia da Coruña que non falan galego. O seu contexto social e cultural non favorece que falen esta lingua nin que a aprendan. Para suplir o déficit lingüístico destas nenas e das súas compañeiras nace a Vitamina G. Coñecemos os ingredientes deste revolucionario suplemento e os resultados das primeiras doses.
Chámome Mariña Lema, teño 26 anos e son de Cabana de Bergantiños, un concello da Costa da Morte.
Dende moi pequena tiven claro que quería ser mestra, ía tan contenta á escola que choraba o sábado e o domingo, non entendía por que na fin de semana non se podía ir. A pesar de telo tan claro, houbo moitos profesores que intentaron que cambiase de rumbo, non comprendían como tendo unhas notas tan boas non prefería facer medicina ou unha enxeñería; pero non houbo quen mo quitara da cabeza. Tras facer Educación Primaria na Coruña, aprobei as oposicións ao ano seguinte e estiven impartindo docencia dous anos no CPI Cabo da Area de Laxe, co que gañei o premio Dígocho Eu de ouro 2023-2024.
O pasado curso estiven no CEIP Sagrada Familia da Coruña, onde me atopei cunha realidade totalmente diferente. Mentres que na Costa da Morte case a totalidade das persoas falamos en galego, na cidade herculina a situación é totalmente oposta. As nenas e nenos preguntábanme: ¿Pero tú hablas en gallego todo el tiempo? ¿En tu cole del año pasado los niños y niñas también lo hablan? ¿Y saben hablar en castellano? ¿Tu familia y tus amigas también lo hablan?…
Ademais, se lles pedía que falasen en galego porque a materia se daba nesta lingua, sentían vergoña porque non tiñan as ferramentas necesarias para facelo. Por outra banda, o número de alumnado procedente do estranxeiro no noso centro é moi elevado e a estes nenos ninguén lles fala galego porque “son de fóra e non entenden” (aínda que leven xa varios anos en Galicia).
Eu non podía quedar sen aportar o meu gran de area para cambiar esta dinámica, así que decidín deseñar un plano de acción total que conseguise despertar a ilusión e a capacidade de traballo do alumnado en materia de dinamización da lingua. Así naceu Vitamina G, un proxecto que emprega a lingua galega como factor de cohesión e integración social, nun contexto cunha alta porcentaxe de nenos e nenas de orixe migrante. Con esta iniciativa gañamos o Premio Mil Primaveras e tamén o Dígocho Eu de ouro 2024-2025.